PARIS – Premtimi i Emmanuel Macron për rikthimin e Francës në punësim të plotë po përballet me një goditje të fortë, ndërsa papunësia vijon të rritet dhe rikthehet në nivele të padukshme prej vitesh.
Për të gjashtën herë radhazi, shkalla e papunësisë u rrit gjatë tremujorit të dytë të vitit, duke arritur në 8.3%, sipas të dhënave të INSEE.
Në vetëm tre muaj, numri i të papunëve u rrit me rreth 62 mijë persona, ndërsa krahasuar me një vit më parë, rritja është me 0.7 pikë përqindjeje. Në total, Franca numëron rreth 2.7 milionë të papunë.
Shifrat janë një goditje për bilancin ekonomik të Macronit, pasi papunësia ishte konsideruar një prej arritjeve të presidencës së tij.
Në vitin 2017, kur Macron u zgjodh president, papunësia ishte rreth 9.7%. Ajo ra gradualisht deri në 7.1% në vitin 2023, niveli më i ulët i regjistruar prej dekadash.
Por trendi tashmë është përmbysur.
Rritja e papunësisë po rikthen çështjen e punësimit në qendër të debatit politik, vetëm tetë muaj para zgjedhjeve presidenciale franceze.
Kandidatët që synojnë të trashëgojnë pushtetin nga Macron po distancohen nga bilanci i tij, ndërsa opozita ka shtuar kritikat.
Edhe ish-kryeministri Édouard Philippe, një prej figurave kryesore që pritet të garojë për presidencën, ka kritikuar situatën ekonomike.
Macron e kishte shpallur punësimin e plotë një prej objektivave kryesore të presidencës së tij.
Sot, vetëm pak muaj para përfundimit të mandatit, një premtim që dikur shihej si sukses po përballet me një realitet shumë më të vështirë:
Papunësia po rritet, miliona francezë janë jashtë tregut të punës dhe premtimi për “punësim të plotë” po zbehet.
