Një tërmet i fuqishëm me magnitudë 7.7 ka goditur ishullin Flores në Indonezi, duke shkaktuar të paktën 51 viktima dhe duke detyruar rreth 5 mijë persona të largohen nga banesat e tyre.
Tërmeti i cekët goditi pak para orës 05:00 të mëngjesit të së shtunës, rreth 15 kilometra nën sipërfaqen e tokës, duke shkaktuar dëme të mëdha në disa zona.
Sipas Agjencisë Kombëtare për Menaxhimin e Fatkeqësive në Indonezi, më shumë se 900 banesa dhe qindra ndërtesa të tjera janë dëmtuar rëndë.
Situata është komplikuar edhe nga pasgoditjet. Autoritetet kanë regjistruar 341 lëkundje të tjera, ndërsa ekipet e shpëtimit vijojnë kërkimet për persona që mund të kenë mbetur nën rrënoja.
Provinca Manggarai është ndër zonat më të goditura.
Dëme të konsiderueshme janë raportuar në shkolla, qendra shëndetësore dhe institucione publike.
Në spitalin rajonal të Rutengut, situata është kthyer në emergjencë. Tavanet e sallave të operacionit dhe klinikave janë shembur, duke detyruar stafin mjekësor të trajtojë pacientët në çadra jashtë ndërtesës.
“Na thanë se do të vinte ndihma mjekësore, por ende nuk ka mbërritur asgjë”, deklaroi zëdhënësja e spitalit, Rista Mari.
Në portin e Maumeres, qyteti më i madh i Flores, pamjet tregojnë momentet dramatike kur pjesë të mëdha betoni u shkëputën nga ndërtesa e terminalit dhe ranë mbi pasagjerët që prisnin të hipnin në tragete.
Situata u përkeqësua kur u shemb edhe kalimi drejt një anijeje, duke bërë që disa persona të përfundonin në det.
Autoritetet indoneziane kanë mobilizuar ekipet e emergjencës dhe kanë nisur dërgimin e tonëve me ndihma dhe furnizime drejt zonave të prekura.
Prioriteti kryesor është evakuimi i banorëve, sigurimi i ushqimeve dhe ujit, si dhe ofrimi i ndihmës mjekësore.
Por ndërsa ekipet vazhdojnë kërkimet, një tjetër tërmet me magnitudë 6.9 është regjistruar në një zonë tjetër të Indonezisë.
Një kujtesë e fortë se vendi ndodhet në të ashtuquajturën “Unaza e Zjarrit” të Paqësorit, një prej zonave më aktive sizmike në botë.
Bilanci i tërmetit pritet të ndryshojë ndërsa ekipet e shpëtimit arrijnë në zonat më të izoluara.
Për mijëra banorë të Flores, nata ka kaluar jashtë shtëpive.
Dhe frika mbetet se nën rrënoja mund të ketë ende njerëz që presin të shpëtohen.
